มูลยมก

ปุจฺฉา – กถญฺจาวุโส ตตฺถ ภควตา ปฐมํ มูลยมกํ วิตฺถารโต วิภชิตฺวา เทสิตํฯ

วิสฺสชฺชนา – เย เกจิ กุสลา ธมฺมา, สพฺเพ เต กุสลมูลาฯ เย วา ปน กุสลมูลา, สพฺเพ เต ธมฺมา กุสลาฯ เย เกจิ กุสลา ธมฺมา, สพฺเพ เต กุสลมูเลน เอกมูลาฯ

เย วา ปน กุสลมูเลน เอกมูลา, สพฺเพ เต ธมฺมา กุสลาฯ เย เกจิ กุสลมูเลน เอกมูลา ธมฺมา, สพฺเพ เต ธมฺมา กุสลมูเลน อญฺญมญฺญมูลาฯ เย วา ปน กุสลมูเลน อญฺญมญฺญมูลา, สพฺเพ เต ธมฺมา กุสลาติ เอวมาทินา ภนฺเต ตตฺถ ภควตา ปฐมํ มูลยมกํ พาวีสติยา จ ติเกหิ ทุกสเตน จ วิตฺถารโต วิภชิตฺวา เทสิตํฯ

เย เกจิ กุสลา ธมฺมา, สพฺเพ เต กุสลมูลาฯ

เย เกจิ กุสลา ธมฺมา, สพฺเพ เต กุสลมูลาติ, ตีเณว กุสลมูลานิ อวเสสา กุสลา ธมฺมา, น กุสลมูลา, เย วา ปน กุสลมูลา, สพฺเพ เต ธมฺมา กุสลาติ, อามนฺตา –

ขนฺธยมก

ปุจฺฉา – อภิธมฺมปิฏเก อาวุโส ฉฏฺเฐ ยมกปฺปกรเณ ทุติยํ ขนฺธยมกํ ภควตา กถํ วิตฺถารโต วิภชิตฺวา เทสิตํฯ

วิสฺสชฺชนา – อภิธมฺมปิฏเก ภนฺเต ฉฏฺเฐ ยมกปฺปกรเณ ทุติยํ ขนฺธยมกํ ‘‘ปญฺจกฺขนฺธา – รูปกฺขนฺโธ เวทนากฺขนฺโธ สญฺญากฺขนฺโธ สงฺขารกฺขนฺโธ วิญฺญาณกฺขนฺโธฯ รูปํ รูปกฺขนฺโธ, รูปกฺขนฺโธ รูปํฯ เวทนา เวทนากฺขนฺโธ, เวทนากฺขนฺโธ เวทนาฯ สญฺญา สญฺญากฺขนฺโธ, สญฺญากฺขนฺโธ สญฺญาฯ สงฺขารา สงฺขารกฺขนฺโธ, สงฺขารกฺขนฺโธ สงฺขาราฯ วิญฺญาณํ วิญฺญาณกฺขนฺโธ, วิญฺญาณกฺขนฺโธ วิญฺญาณ’’นฺติ เอวมาทินา ภควตา ปณฺณตฺติวารปวตฺติวารปริญฺญาวารสงฺขาเตหิ ตีหิ วาเรหิ วิตฺถารโต วิภชิตฺวา เทสิตํฯ